'അദ്ദേഹം എന്റേയും പ്രധാനമന്ത്രിയാണ്'മോദിയെ പരിഹസിച്ച പാക് മന്ത്രിക്ക് മറുപടിയുമായി കെജ്രിവാള്‍

ന്യൂഡൽഹി: പ്രധാനമന്ത്രി നരേന്ദ്ര മോദിയെ വിമർശിച്ച പാക് മന്ത്രി ഫവാദ് ഹുസൈന് മറുപടിയുമായി ഡൽഹി മുഖ്യമന്ത്രി അരവിന്ദ് കെജ്രിവാൾ. ഇന്ത്യയുടെ ആഭ്യന്തര കാര്യങ്ങളിൽ പുറത്തുനിന്നൊരാൾ ഇടപെടേണ്ടതില്ലെന്ന് മോദിയെ പരിഹസിച്ചു കൊണ്ടുള്ള ഫവാദ് ഹുസൈന്റെ ട്വീറ്റിന് കെജ്രിവാൾ പ്രതികരിച്ചു. യുദ്ധമുണ്ടായാൽ പാകിസ്താനെ പരാജയപ്പെടുത്താൻ ഇന്ത്യൻ സൈന്യത്തിന് പത്ത് ദിവസം മതിയാവുമെന്ന പ്രധാനമന്ത്രി മോദിയുടെ പ്രസ്താവനയെ പരിഹസിച്ച് ഫവാദ് ഹുസൈൻ നേരത്തെ രംഗത്തുവന്നിരുന്നു. ഡൽഹി തിരഞ്ഞെടുപ്പിൽ പരാജയപ്പെടുമെന്നുള്ള സമ്മർദത്തിൽ മോദി പലതരം അവകാശവാദങ്ങളും ഭീഷണികളും മുഴക്കി രാജ്യത്തെ അപകടപ്പെടുത്തുകയാണെന്നുംകശ്മീർ, പൗരത്വ നിയമം, സമ്പദ്ഘടനയിലെ പ്രശ്നങ്ങൾ എന്നിവയെത്തുടർന്ന് പ്രധാനമന്ത്രിക്ക് അടിതെറ്റിയെന്നും ഫവാദ് ഹുസൈൻ പരിഹസിച്ചു. ഇന്ത്യയിലെ ജനങ്ങൾ #ModiMadness-നെ പരാജയപ്പെടുത്തണമെന്നും ഫവാദ് പറഞ്ഞു. ഇതിന് മറുപടിയുമായാണ് കെജ്രിവാൾ രംഗത്തുവന്നത്. നരേന്ദ്ര മോദി ഇന്ത്യയുടെ പ്രധാനമന്ത്രിയാണ്. അദ്ദേഹം എന്റെ പ്രധാനമന്ത്രിയും കൂടിയാണ്. ഡൽഹി തിരഞ്ഞെടുപ്പ് ഇന്ത്യയുടെ ആഭ്യന്തര കാര്യമാണ്. ഇതിൽ തീവ്രവാദത്തെ പിന്തുണയ്ക്കുന്നവർഇടപെടുന്നത് ഞങ്ങൾ സഹിക്കില്ല. പാകിസ്താൻ എത്രവേണമെങ്കിലും ശ്രമിച്ചോളൂ, എന്നാൽ എത്ര ശ്രമിച്ചാലും ഇന്ത്യയുടെ ഐക്യത്തിന് ഒരു ദോഷവും വരുത്താൻ കഴിയില്ലെന്നും കെജ്രിവാൾ ട്വിറ്ററിലൂടെ പ്രതികരിച്ചു. ഡൽഹി തിരഞ്ഞെടുപ്പ് അടുത്തിരിക്കെ ആം ആദ്മിയും ബിജെപിയും തമ്മിലുള്ള വാദപ്രതിവാദങ്ങൾ ശക്തമാവുന്നതിനിടെയാണ് തന്റെ കടുത്ത വിമർശകനായ മോദിക്ക് പിന്തുണ അറിയിച്ച് ഫവാദ് ഹുസൈനെതിരെ കെജ്രിവാൾ രംഗത്തുവന്നത്. Content Highlights:Narendra Modi My PM Too, says Arvind Kejriwal in Response To Pak Minister Fawad Hussain

from mathrubhumi.latestnews.rssfeed https://ift.tt/2ScxmN8
via IFTTT